MASS - bloom exploration

Endamálið við verkstovuni er at geva børnum møguleika at uppliva sambandið við eitt djóraslag úr einum listaligum og óvæntaðum sjónarhorni. Børnini skulu í samstarvi við mjølmaðkar skapa eina lítla standmynd úr skúmplasti. Støðið er koreografiska installatiónin MASS - bloom explorations, har 200.000 plastetandi mjølmaðkar og eitt menniskja liva saman í einum skúmplastumhvørvi í Norðurlandahúsinum.

Við støði í MASS-installatiónini bjóða vit børnum at samskapa saman við mjølmaðkunum.

Verkstovan byrjar við eini taktilari sansauppliving. Vit skapa uppmerksemi um kensluna av at uppliva ymiskt blundandi, eitt nú nerta við ymsar flatur, at leiða hvønn annan o.t. Málið er at lata eyguni upp fyri sansaliga sambandinum okkara millum.

Síðani koma mjølmaðkarnir upp í leikin sum samstarvsfelagar á verkstovuni. Eins og ein vísindalig roynd eygleiða vit fyrst, hvussu teir røra seg, kjakast um hvørjir og hvussu teir eru, fyri síðan at fara at samskifta við teir. Umframt ítøkilig fakta um mjølmaðkar vilja vit lata upp fyri einum fiktivum lag, har børnini koma við sínum egnu tonkum um maðkarnar. Fysiska sambandið við maðkarnar fer fram við varligum slow motion-handarørslum.

Nú sleppa børnini at skapa smáar standmyndir úr skúmplasti og træpinnum. Tá ið standmyndirnar eru fyrireikaðar, sleppa maðkarnir at eta tær. Børnini eru partur av hesi prosess, hyggja at og lurta, meðan maðkarnir eta og samstundis endurskapa standmyndirnar.

At enda gera vit eitt heim til mjølmaðkarnar. Hvussu skulu teir búgva fyri at trívast? Vit koma við veruligari vitan og lata børnini sjálv hugsa um framtíðina hjá maðkum, menniskjum og øðrum djórasløgum.


Heiti: MASS - bloom exploration
Listafólk: Recoil Performance Group / Micela Kühn Jara og Emile Gregersen
Málbólkur: 0. - 3. flokkur
Tal á næmingum: 5 - 30
Høli: Stórt flokshøli við nóg mikið av plássi at skipa borð og gólv at ganga ímillum
Krøv: Saksar og smáir pinnar at gera royndir við (t.d. grillpinnar)
Longd: 2 dagar
Tíðarskeið: 9. - 13. mars 2020