Aldubáran (FO)
Kenda barnabókin “Vampýrella” hjá Edward Fuglø fær við hesari framførslu nýtt lív. Í framførsluni hoyra vit nýskrivaðan tónleik eftir Páll Sólstein saman við søgu og myndum úr bókini. Endamálið er at geva børnum eina fjølbroytta, listarliga uppliving á høgum støði, har tónleikur, frásøgn og myndlist renna saman í eina heild.
Longd: 45 minuttir
Tíðarskeið: 2. - 6. mars 2026
Feðgarnir Smith (FO)
Ein skapandi og sansalig verkætlan har næmingarnir saman skapa stór sandlistaverk. Verkætlanin byggir á samstarv, hugflog og kensluligt tilknýti til náttúruna. Endaliga listaverkið verður skjalfest við myndatøku - og strikað burtur av náttúruni sjálvari.
Longd: 1 - 1 1/2 tími til eina standmynd
Tíðarskeið: Mars 2026
Beinta, Borgfríð og Julia (FO)
Við sangleiki verða næmingarnir á ein áhugaverdan hátt leiddir aftur til gerandisdagin í gomlu Føroyum. Á túrinum til neyta fara neytakonurnar at fortelja og syngja um huldufólk og bygdafólk gjøgnum kendar føroyskar yrkingar, vísur og barnasangir. Næmingarnir síggja eisini brúkslutir frá gomlum døgum í sýningini.
Longd: 45 minuttir
Tíðarskeið: 3. - 7. nov. 2025
Duo Cortese Ruymbeek (EN)
Undirvísararnir fara í hesi verkætlanini at framføra og undirvísa næmingunum í løgum og tekstum, ið eru skrivað til minnis um persónar og hendingar. Komið verður inn á bæði eldri og nýggjari tílík fólkaløg. Á verkstovuni fáa næmingarnir høvi at gera sítt egna lag, sangtekst ella sang til minnis um ein persón ella eina hending, ið teir meta, hevur virði at minnast.
Longd: 3 tímar (framførsla í 1 tíma, verkstova í 2 tímar)
Tíðarskeið: 3. - 7. mars 2026
Maibritt Marjunardóttir (FO)
Vit fara við hugfloginum og hondunum at kanna, um vit kunnu knýta og binda kenslur. Við træðrum, stokkum og heklinálum skapa vit abstrakt listaverk, ið endurspegla okkara egnu sansan og tilvitan. Ein opin og undrandi tilgongd, har kenslur fáa skap.
Longd: 4 verkstovur á 3 skúlatímar hvør
Tíðarskeið: Vika 44 - 48 (27. okt. - 28. nov. 2025)
Kunstpilotene (NO)
Ein sansalig og skapandi listaverkætlan, har næmingarnir gjøgnum tveir dagar arbeiða við havinum sum íblásturi. Tey savna plantur, skapa egið pappír og mála við havvatni - alt í einum listarligum og umhvørvisligum samanhangi. Møguleiki er fyri at enda verkætlanina við einari uttandura framsýning.
Longd: 2 verkstovur á 3–4 tímar hvør
Tíðarskeið: mars 2026
Karen Fleischer og Malu Lynge (GL)
Ein livandi framførsla við grønlendskum maskudansi og søgufrásøgn, har næmingarnir fáa innlit í litir, maskur, rørslur og týdningin av hesum siðbundna dansi. Ein sterk mentanarlig uppliving, ið sameinar list, søgu og kropsligt úttrykk. Framførslan gevur næmingunum møguleika at uppliva eina ríka og siðbundna mentan á ein nærverandi og sansaligan hátt.
Longd: 30 min.
Tíðarskeið: 19. - 23. jan. 2026
Phønix (DK)
Ein livandi og fangandi tónleikaframførsla við spennandi rútmum, stuttligum rímum og øgiligum fólkavísum úr norðurlendskari mentan. Phønix bjóðar næmingunum inn í ein heim av ljóðførum við innliving, sangi og rútmum, har kroppurin verður nýttur sum slagverk.
Longd: 45 minuttir
Tíðarskeið: 9. - 13. mars 2026
Dhamal World Collective (FI/IN)
Findia Express er ein fjølbroytt og litføgur tónleikaframførsla við rótum í svensk-finskari og indiskari mentan. Charlotta Kerbs og Sanjay Khan leiða okkum á eina ferð við livandi ljóði og spennandi útlendskum ljóðførum, har næmingarnir luttaka við rødd og rørslum. Ein fagnaður fyri fjølmentan, vinarlag og tónleikarliga samveru.
Longd: 40 minuttir
Tíðarskeið: 23 .- 27. mars 2026
Øyvind Hjelmen (NO)
Verkstovan snýr seg um at skilja, byggja og skapa við tí mest grundleggjandi í myndatøku: ljósi og myrkuri. Næmingarnir byggja egið myndatól, læra um “camera obscura”, negativa og positiva mynd, og uppliva, at ein mynd kann skapast uttan linsu og tøkni. Eftir verkstovuna verður viðmælt at gera eina framsýning av myndunum, sum næmingarnir hava tikið.
Longd: Ein skúladagur (08:30-14:00)
Tíðarskeið: 16. - 20. mars 2026
Ensemble Eiradís (4 tónleikarar) (FO/SE)
Hendan verkætlan gevur næmingum møguleika og amboð at royna seg sum tónaskøld saman við yrkistónleikarum úr eini saksofonkvartett. Undirvíst verður í ymsum tónleiki, nótum og grafiskum hættum at skriva tónleik við. Verkstovan endar við einari framførslu, har Ensemble Eiradís spælir nýskaptu verkini hjá næmingunum.
Longd: Ein skúladagur (4 x 45 minuttir + fríkorter)
Tíðarskeið: 16. - 20. feb. 2026
Nina Molven (NO)
Ein spennandi verkstova og framsýning, har næmingar læra um lívið og listina hjá Edvard Munch gjøgnum frásøgn og samtalur og eisini fara at skapa sína egnu list. Dentur verður lagdur á kenslur, hugflog og at næmingarnir fáa møguleika at finna sítt egna úttrykk.
Longd: Ein skúladagur (08:30–12:30)
Tíðarskeið: 3. - 8. nov. 2025
Hettarher & Jákup Veyhe (FO)
Jákup Veyhe fer saman við tónleikabólkinum ”hettarher” at endurgeva søgur frá forfedrum okkara í nýggjum hami. Næmingarnir opna oyruni og nýta hugflogið at ferðast 100 ár aftur í tíðina - inn í ein ævintýraheim, har nógvar hugsandi verur livdu í Føroyum.
Longd: 30 - 40 minuttir
Tíðarskeið: 12. - 16. jan. 2026
Leikfelagið TVAZZ (FO)
Vit fara saman við Gunnvá Zachariasen á eina spennandi ferð aftur í tíðina, har vit hoyra um Sáru Malenu - eina gandakelling úr Skúvoy, sum doyði í 1903. Men dugdi hon veruliga gand? Ella var hon bert ein fátæk, barnleys einkja, sum royndi at lívbjarga sær?
Longd: 45 minuttir
Tíðarskeið: 2. - 6. februar 2026
Sarah Aviaja Hammeken, Alexander Montgomery-Andersen & Mathilde Rosengren Bruun (AVIAJA dance) DK/GL
Ein sansalig og hjartanemandi dansiframførsla um at hava røtur í tveimum londum - Grønlandi og Danmark - og um at finna samleika sín ímillum ymsar mentanir og tungumál. Í “Mál/leys” granskar Hammeken, hvat tað merkir at hoyra til - og at kenna seg fremmandan. Næmingarnir fáa eisini høvi at luttaka í sjálvari framførsluni.
Longd: 90 min.
Tíðarskeið: 17. - 21. nov. 2025
